Radio Laascaanood - The Real Voice of Sool, Sanaag & Cayn

Laascaanood 24 Mar 2007 Saaka subaxnimadii waxaa hoolka shirarka ee Huteel Xamdi ka dhacay xaflad ballaadhan oo si weyn loo soo qaabeeyey, waxaana ujeedada xafladaasi ahayd xusitaanka Maalinta Qaaxada adduunka oo dunidoo dhan laga xusayey.maanta oo ay taariikhdu tahay 24 march oo ah maalinta caalamka oo dhan looga aqoonsaday inay noqota xuska TBda

Munaasibadii kulankaasi waxaa lagu furay aayadaha quraanka kariimka ah ka dibna waxaa si xushmad leh loogu soo dhaweeyey codbaahiyaha Dr: Cabdi Maxamed Buraale oo isagu ah madaxa waaxda TB ee cisbitaalka dhexe ee magaalada Laascaanood, waxaanu goobtaasi ku xusay sida ay waaxdoodu u shaqayso, tan iyo intii uu mas’uuliyadeeda uu qaaday.

Waxaa kaloo oo uu si gaar ahaaneed u xusay shakhsiyaad deegaanka u dhashay oo iyagu dalka dibadiisa ku nool oo si joogta ah kaalmooyin aan kala go’in ugu soo dira, sida shakhsiyaad ku nool midowga boqortooyada ingiriiska.

Ka dibna waxaa loo gudbiyey Mudane Axmed Cabdi Cali Shire(Axmedkayse), oo isagu ah madaxa hay’adda SSHDA oo iyadu sanooyinkii la soo dhaafay ka hawl galaysey deegaanada SSCayn. Waxaanu si xogogaalnimo ah uga waramay doorka ay hay’adoodu ka qaatay dhinaca caafimaadka, waxaanu shacabka deegaanka ku booriyey in ay meel uga soo wada jeestaan la dagaallanka iyo cidhibtirka Qaaxada oo daawadeedu ay ka fududahay Hargabka amaba durayga.

Waxaa kaloo uu xusay inay cisbitaalka loogu diyaariyey daawayn joogta ah oo lacag la’aan ah, halkaasina ay diyaar ugu yihiin dhakhaatiir iyagu aqoon durugsan u leh daawaynta Qaaxada.

Madashii hoolkaasi waxaa isna lagu marti qaaday Abwaanka da’da yar ee la yidhaahdo Baashe Axmed Xasan, oo isna halkaasi ku soo bandhigay suugaan qoto dheer oo uu kaga hadlayey Qaaxada iyo siday u dhib yar tahay daawaynteedu.

Docda qurba joogta deegaanka waxaa isna madashaasi lagu marti qaaday Cali Dhakaawe oo markii hore deganaan jirey cariga ingiriiska balse haatan u soo guuray Laascaanood, waxaanu xusay in uu aad ugu qanacsan yahay nabadgelyada deegaanka ka jirta